លោក ជូ មុនីដារិន អគ្គនាយករងនៃអគ្គនាយដ្ឋានគាំពារបរិស្ថាន ក្រសួងបរិស្ថាន ថ្ងៃទី២២ ខែមិថុនា ឆ្នាំ២០២៤ បានដឹកនាំមន្ត្រីពីនាយកដ្ឋានជំនាញ និងមន្ទីរពិសោធន៍ សហការជាមួយមន្ទីរបរិស្ថាន មន្ទីរធនធានទឹកនិងឧតុនិយម រដ្ឋបាលជលផលខេត្តព្រះសីហនុ រដ្ឋបាលស្រុកកំពង់សីលា និងអជ្ញាធរមូលដ្ឋាន បានចុះពិនិត្យករណីបំពុលទឹកស្ទឹង និងត្រីងាប់ ដែលបង្ហូរចេញពីរោងចក្រចម្រាញ់ប្រេងដូងទី២ (ម៉ុង ប្ញទ្ធី វិនិយោគទុន ដំណាំដូងប្រេងកម្ពុជា) ដែលមានទីតាំងនៅភូមិ អន្លង់ក្រពើ ឃុំតានៃ ស្រុកព្រៃនប់ ខេត្តព្រះសីហនុ។ បេសកម្មខាងលើ ក្រុមការងារទទួលបានូវលទ្ធផលដូចខាងក្រោម:
១. ការចុះត្រួតពិនិត្យ ស្ថានភាពទីតាំងបំពុលក្នុងនោះរួមមាន ៖
-ទីតាំងព្រែកក្អោង ស្ថិតនៅភូមិបឹងត្រឡាច ឃុំចំការហ្វូងស្រុកកំពង់សីលា ខេត្តព្រះសីហនុ ព្រមទាំងបានយកសំណាកទឹក០១
-ទីតាំងកំពង់ដំរី ត្រង់ចំនុចអូរឡុលឡាក់ ភូមិសម្តេចតា ឃុំចំការហ្វួង ស្រុកកំពង់សីលា ព្រមទាំងបានយកសំណាកទឹកចំនួន ០២សំណាក ស្ថិតនៅផ្នែកម្ខាងៗនៃទំនប់
-ទីតាំងស្ថិតនៅក្នុងបរិវេណរោងចក្រ និងយកសំណាកទឹកក្រោយចេញពីអាងប្រព្រឹត្តិកម្មចំនួន ០១ សំណាកមកវិភាគនៅមន្ទីរពិសោធន៍ក្រសួងបរិស្ថាន
២. ពិភាក្សាជាមួយស្ថាប័នពាក់ព័ន្ធ ភាគីខាងរោងចក្រ ដើម្បីប្រមូលធាតុចូលស្តីអំពីករណីបំពុលដោយរោងចក្រ និងដំណោះស្រាយ
៣.ចុះពិនិត្យតាមដានស្ថានភាពរោងចក្ររួមមានដំណើរការសង្វាក់ផលិតកម្ម និង ការប្រព្រឹត្តិកម្មសំណល់រាវចេញពីរោងចក្រ
ក្រោយពីការចុះត្រួតពិនិត្យខាងលើ ខាងភាគីរោងចក្របានទទួលស្គាល់ពីករណីបំពុលទឹកស្ទឹងដោយសារ ការគ្រប់គ្រងសំណល់រាវមិនបានប្រុងប្រយ័ត្ន រួមផ្សំជាមួយបច្ចេកទេសប្រព្រឹត្តិកម្មសំណល់ជាង១០ឆ្នាំពុំសូវមានប្រសិទ្ធភាព ៕
