ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានបង្ហាញការគាំទ្រ និងលើកទឹកចិត្តចំពោះការវិនិយោគណាមួយទៅលើសំណល់ប្លាស្ទិក ដែលជាផ្នែកមួយ ក្នុងការកាត់បន្ថយការបំពុលបរិស្ថាន ដោយបន្តពង្រឹងការគ្រប់គ្រង សំណល់ទីប្រជុំជន ប្លាស្ទិក និងសំណល់គ្រោះថ្នាក់នានានៅកម្ពុជា។
ការលើកឡើងពីសំណាក់រដ្ឋមន្រ្តីក្រសួងបរិស្ថានបែបនេះ ក្នុងពេលដែលជួបពិភាក្សា ការងារជាមួយក្រុមហ៊ុន អេ១ ប្លាស្ទីក រីសសន៍ លីមីធីត លើការវិនិយោគលើសំណល់ ប្លាស្ទិកនៅកម្ពុជា តាមរយៈការកែច្នៃសំណល់ប្លាស្ទិកឡើងវិញ ដែលមានលក្ខណៈជាពាណិជ្ជ កម្ម និងមានលទ្ធភាពនាំចូលទៅកាន់ទីផ្សារអន្តរជាតិ។
នៅក្នុងជំនួបពិភាក្សានាថ្ងៃទី២១ ខែកុម្ភៈ ឆ្នាំ២០២៤នេះ លោកស្រី លី ហុង ឡាន ដេបូរា អាន់នី (LEE Hong Lan Deborah Anne) បានថ្លែងសរសើរចំពោះកិច្ចខិតខំ ប្រឹងប្រែង របស់ក្រសួងបរិស្ថាន ដែលធ្វើឱ្យការនាំចូលថង់ប្លាស្ទិកមានការថយចុះជាង ៥០ភាគរយ នាពេលថ្មីៗនេះ តាមរយៈយុទ្ធនាការដែលមានសិស្សានុសិស្ស កម្មករ កម្មការិនី ព្រះសង្ឃ អាជ្ញាធរ និងប្រជាពលរដ្ឋមូលដ្ឋាន បានចូលរួមជាច្រើនលាននាក់ ស្របតាមការដាក់ ចេញយុទ្ធសាស្រ្តចក្រាក្នុងវិស័យបរិស្ថាន។
លោកស្រី LEE Hong Lan Deborah Anne បានសំដែងការចាប់អារម្មណ៍ខ្ពស់ ចំពោះឱកាសវិនិយោគលើការកែច្នៃប្លាស្ទិកឡើងវិញ ដោយប្រព័ន្ធ Recycled Polyethylene Terephthalate (RPET) ដើម្បីបានចូលរួមចំណែកជាមួយក្រសួងបរិស្ថាន ក្នុងការកាត់ បន្ថយចំនួនសំណល់ប្លាស្ទិក ពីអាជីវកម្ម និងអ្នកប្រើប្រាស់។ ក្នុងពិធីនេះដែរ លោកស្រី បានបង្ហាញជូនដំណើរការផលិតកម្ម ដែលផ្តល់អត្ថប្រយោជន៍ ដល់ការលើកស្ទួយសេដ្ឋកិច្ច របស់ប្រជាពលរដ្ឋផងដែរ។
ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានថ្លែងដោយ គាំទ្រចំពោះសកម្មភាពវិនិយោគទាំងឡាយណា ដែលបានគិតគូរដល់ប្រយោជន៍ប្រជាពលរដ្ឋ និងប្រជាសហគមន៍មូលដ្ឋានជាធំ ហើយជាពិសេសការរួមចំណែក ក្នុងការធ្វើឱ្យសហគមន៍ និងប្រជាពលរដ្ឋមានភាពជាម្ចាស់ ឯករាជ្យភាព គិតគូរដល់ផលប៉ះពាល់បរិស្ថាន ស្របតាមយុទ្ធសាស្រ្តបញ្ចកោណរបស់រាជរដ្ឋាភិបាលកម្ពុជា ដំណាក់កាលទី១ ដែលផ្តោតការយកចិត្តទុកលើការកាត់បន្ថយការបំពុលបរិស្ថាន ដោយបន្តពង្រឹងការគ្រប់គ្រង សំណល់ទីប្រជុំជន ប្លាស្ទិក និងសំណល់គ្រោះថ្នាក់ ការត្រួតពិនិត្យការបំពុលទឹក ខ្យល់ និងសំឡេងព្រមទាំងបន្តជំរុញថាមពលស្អាត ប្រសិទ្ធភាពថាមពល ការអនុវត្តកសិកម្មវៃឆ្លាត ធន់នឹងការប្រេប្រួលអាកាសធាតុ ការដឹកជញ្ជូនបៃតង ដំណើរការឧស្សាហកម្មស្អាត ការអនុវត្តសេដ្ឋកិច្ចចក្រា យន្តការវាយតម្លៃហេតុប៉ះ ពាល់បរិស្ថាន វិញ្ញាបនកម្មបៃតង និងការប្រតិបត្តិមេត្រីភាពបរិស្ថាន៕
