ការចុះត្រួតពិនិត្យលើកទីពីរនេះ ម្ចាស់រោងចក្រកែច្នៃស្បែកសត្វ ដែលបង្ហូរទឹកសម្អុយចូលព្រែកសង្កែហាក់មានឥរិយាបថដូចកូនឈ្លូស មិនគ្រហឹមដូចខ្លា កាលចុះលើកទីមួយនោះទេ ! ការចុះលើកនេះរបស់ក្រុមការងារមានទាំងមេធាវី និងមន្ត្រីនគរបាលយុត្តិធម៌ផងដែរ ធ្វើឡើងនៅថ្ងៃទី ២៦ ខែមីនា ឆ្នាំ ២០២៤ ដោយក្រុមការងារអធិការកិច្ចនៃអគ្គនាយកដ្ឋានគាំពារបរិស្ថាន ដឹកនាំដោយលោក ជូ មុនីដារិន អគ្គនាយករង តំណាងពីនាយកដ្ឋានវាយតម្លៃហេតុប៉ះពាល់បរិស្ថាន រួមជាមួយមន្រ្តីមន្ទីរបរិស្ថានខេត្តព្រះសីហនុ (ជាមន្ត្រីនគរបាលយុត្តិធម៌) ក្រោមការណែនាំពីព្រះរាជអជ្ញារងខេត្តព្រះសីហុន ដោយមានការចូលរួមពីរមន្រ្តីជលផលខេត្តព្រះសីហនុ រដ្ឋបាលស្រុកព្រៃនប់ និងអាជ្ញាធរឃុំទឹកថ្លា និងមេភូមិព្រែកសង្កែ ពីករណីបង្កការបំពុលទឹកព្រែកសង្កែ ពីរោងចក្រកែច្នៃស្បែកសត្វ Cambodian Noble Taste Food Co., Ltd. ស្ថិតនៅផ្លូវជាតិលេខ3 ក្នុងឃុំទឹកថ្លា ស្រុកព្រៃនប់ ខេត្តព្រះសីហនុ។ ការចុះត្រួតពិនិត្យនេះក៏មានការចូលរួមណែនាំផ្នែកច្បាប់ពីមេធាវីក្រសួងបរិស្ថាន ក្នុងការសាកសួរ និងកសាងសំណុំរឿងផងដែរ។
ជាលទ្ធផល៖
– ក្រុមការងារសង្កេតឃើញស្ថានភាពនៃការបំពុលមានសភាពដូចស្ថានភាពនៃចុះត្រួតពិនិត្យលើកទី១ នៅថ្ងៃទី២៣ ខែមីនា ឆ្នាំ២០២៤។ យ៉ាងណាក៏ដោយ ក្រុមហ៊ុនបានបង្ហូរទឹកពីអាងស្តុកចុងក្រោយចូលក្នុងព្រែកសង្កែក្នុងបរិមាណច្រើនជាងមុន ។
– ក្រុមហ៊ុនបានទទួលស្គាល់អំពីកំហុសដែលបានបង្កផលប៉ះពាល់បរិស្ថាន តាមរយៈការបំពុលទឹកព្រែកសង្កែ
– ក្រុមការងារបានយកសំណាកទឹកចំនួន៦ទីតាំងដើម្បីវិភាគផ្ទៀងផ្ទាត់
-ក្រុមការងារបានបំពេញលើទម្រង់កំណត់ហេតុចំនួន៣ រួមមាន៖
o កំណត់ហេតុចុះពិនិត្យទីតាំងកើតហេតុ
o កំណត់ហេតុស្តាប់ចម្លើយរបស់អ្នកគ្រប់គ្រងរោងចក្រ
o កំណត់ហេតុយកគំរូសំណាកទឹកមកវិភាគ
– ក្រុមការងារនឹងបន្តការងារធ្វើនៅថ្ងៃទី២៧ ខែមីនាទៀត ដោយសហការជាមួយមន្ត្រី និងអ្នកពាក់ព័ន្ធក្នុងមូលដ្ឋានដើម្បីវាយតម្លៃពីផលប៉ះពាល់បរិស្ថាន ៕